shauq hai to hai us kā ghar nazdīk

dūrī-e-rah hai rāhbar nazdīk

aah karne meñ dam ko sādhe rah

kahte haiñ dil se hai jigar nazdīk

duur vāloñ ko bhī na pahuñche ham

yahī na tum se haiñ magar nazdīk

Dūbeñ dariyā-o-koh-o-shahr-o-dasht

tujh se sab kuchh hai chashm-e-tar nazdīk

harf duurī hai garche inshā lek

diijo ḳhat jā ke nāma-bar nazdīk

duur ab baiThte haiñ majlis meñ

ham jo tum se the beshtar nazdīk

ḳhabar aatī hai so bhī duur se yaañ

aao yak-bār be-ḳhabar nazdīk

tosha-e-āḳhirat kā fikr rahe

jī se jaane kā hai safar nazdīk

daur phirne kā ham se vaqt gayā

pūchh kuchh haal baiTh kar nazdīk

mar bhī rah 'mīr' shab bahut royā

hai mirī jaan ab sahar nazdīk