gar kuchh ho dard ā.īna yuuñ charḳh-e-zisht meñ

in sūratoñ ko sirf kare ḳhāk-o-ḳhisht meñ

rakhtā hai soz-e-ishq se dozaḳh meñ roz-o-shab

le jā.egā ye soḳhta-dil kyā bahisht meñ

āsūda kyūñke huuñ maiñ ki mānind-e-gard-bād

āvārgī tamām hai merī sarisht meñ

kab tak ḳharāb sa.ī-e-tavāf-e-haram rahūñ

dil ko uThā ke baiTh rahūñgā kunisht meñ

mātam ke huuñ zamīn pe ḳhirman to kyā ajab

hotā hai niil charḳh kī us sabz kisht meñ

sarmast ham haiñ āñkhoñ ke dekhe se yaar kī

kab ye nasha hai duḳhtar-e-raz tujh palisht meñ

rindoñ ke ta.iiñ hamesha malāmat kare hai tū

ājā.iyo na shaiḳh kahīñ hasht-bahisht meñ

naame ko chaak kar ke kare nāma-bar ko qatl

kyā ye likhā thā 'mīr' marī sar-navisht meñ