dil baham pahuñchā badan meñ tab se saarā tan jalā

aa paḌī ye aisī chiñgārī ki pairāhan jalā

sarkashī hī hai jo dikhlātī hai is majlis meñ daaġh

ho sake to sham.a saañ diije rag-e-gardan jalā

badar saañ ab āḳhir āḳhir chhā ga.ī mujh par ye aag

varna pahle thā mirā juuñ maah nau dāman jalā

kab talak dhūnī lagā.e jogiyoñ kī sī rahūñ

baiThe baiThe dar pe tere to mirā aasan jalā

garmī us ātish ke par kaale se rakhe chashm tab

jab koī merī tarah se deve sab tan man jalā

ho jo minnat se to kyā vo shab nashīnī baaġh kī

kaaT apnī raat ko ḳhār-o-ḳhas-e-gulḳhan jalā

sūkhte hī āñsuoñ ke nuur āñkhoñ kā gayā

bujh hī jaate haiñ diye jis vaqt sab roġhan jalā

shola afshānī nahīñ ye kuchh na.ī is aah se

duuñ lagī hai aisī aisī bhī ki saarā ban jalā

aag sī ik dil meñ sulge hai kabhū bhaḌkī to 'mīr'

degī merī haDDiyoñ kā Dher juuñ īñdhan jalā