ḳhūgar-e-ru-e-ḳhush-jamāl haiñ ham
nāz-e-parvarda-e-visāl haiñ ham
ham ko yuuñ rā.egāñ na kar denā
hāsil-e-fasl-e-māh-o-sāl haiñ ham
rañg hī rañg ḳhushbū hī ḳhushbū
gardish-e-sāġhar-e-ḳhayāl haiñ ham
raunaq-e-kārobār-e-hastī haiñ
ham ne maanā shikasta-hāl haiñ ham
māl-o-zar, māl-o-zar kī qīmat kyā
sāhab-e-daulat-e-kamāl haiñ ham
kis kī rānā.i-e-ḳhayāl hai tū
terī rānā.i-e-jamāl haiñ ham
aise dīvāne phir na ā.eñge
dekh lo ham ko be-misāl haiñ ham
daulat-e-husn-e-lā-zavāl hai tū
daulat-e-ishq-e-lā-zavāl haiñ ham