kabhī idhar jo sag-e-kū-e-yār aa niklā

gumāñ huā mire vīrāne meñ humā niklā

ruḳh us kā dekh huā zard nayyar-e-āzam

sunahre burj se jis dam vo mah-laqā niklā

vo sun ke paak mohabbat kā naam kahte haiñ

hamārī jaan ko lo ye bhī pārsā niklā

hamāre paañv paḌe aa ke aable har gaam

kabhī jo dasht-e-junūñ meñ barhana-pā niklā

mah-e-siyām meñ aayā jo vo hilāl-abrū

gumāñ huā ye mujhe chāñd iid kā niklā

jahāñ kī sair to kī tū ne lekin ai shah-e-husn

kabhī faqīr ke takiye pe tū na aa niklā

na niklā vahm ke maare vo ghar se bhī 'sayyah'

galī se yaar ke tābūt jab mirā niklā