abhī tak jab hameñ jiinā na aayā

bharosā kyā ki kal aayā na aayā

jale ham yuuñ ki jaise chob-e-nam hoñ

charāġhoñ kī tarah jalnā na aayā

ġhuleleñ lā ke bachche pūchhte haiñ

parinda kyuuñ vo dobārā na aayā

maiñ kyā kahtā ki sab ke saath meñ thā

ayādat ko bhī vo tanhā na aayā

ihāta chahār-dīvārī añdherā

kisī jānib bhī darvāza na aayā

vo pahle kī tarah bichhḌā hai ab bhī

magar ab ke hameñ ronā na aayā

ḳhazāna le uḌā choroñ kā jatthā

palaT kar phir alī-bābā na aayā