kyā ḳhabar hai na mile phir koī shīsha aisā

ḳhud ko chhūte hue Dartā huuñ shikasta aisā

sabza-e-lams pe baḌhtā huā lamha lamha

sust-rau sho.ala-e-tūfān-e-tamannā aisā

ab na dastak meñ sadā hai na hai zanjīr meñ shor

band ab tak na huā thā dar-e-tauba aisā

saañs ke saath lapaktā hai tah-e-mauj-e-ḳhayāl

kis ne boyā thā mire jism meñ sho.ala aisā

sar se Tapkā jo shajar ke to zamīñ bhī na milī

ab ke ik barg-e-javāñ shāḳh se TuuTā aisā

aks ko naqsh to jazbe ko karūñ pāra-e-rañg

kal ke ā.īne se jhāñkegā na chehra aisā

ab to zanjīr-e-ta.alluq hai na vo rishta-e-dard

maiñ vo ḳhush-baḳht ki paayā hai zamāna aisā