haq merī mohabbat kā adā kyuuñ nahīñ karte
tum dard to dete ho davā kyuuñ nahīñ karte
kyuuñ baiThe ho ḳhāmosh sirhāne mere aa kar
yaaro mire jiine kī duā kyuuñ nahīñ karte
phūloñ kī tarah jism hai patthar kī tarah dil
jaane ye hasīñ log vafā kyuuñ nahīñ karte
har baat parindoñ kī tarah uḌtī huī sī
jo baat bhī karte ho sadā kyuuñ nahīñ karte
lo dekho 'hamīdī' lab-e-dariyā pe hai dariyā
par pyaas hai kab kī ye patā kyuuñ nahīñ karte