poshīda dekhtī hai kisī kī nazar mujhe
dekh ai nigāh-e-shauq tū rusvā na kar mujhe
maqsad se be-niyāz rahā zauq-e-jushtujū
maiñ be-ḳhabar huā jo huī kuchh ḳhabar mujhe
maiñ shab kī bazm-e-aish kā mātam-nashīñ huuñ aap
ro ro ke kyuuñ rulātī hai sham.a-e-sahar mujhe
hairat ne merī ā.īna un ko banā diyā
kyā dekhte ki rah ga.e vo dekh kar mujhe
qurbān jā.ūñ chhoḌ takalluf kī guftugū
kah kar pukār 'vahshat'-e-shorīda-sar mujhe