āh-e-shab nāla-e-sahar le kar
nikle ham tosha-e-safar le kar
shaġhl hai naala kuchh murād nahīñ
kyā karūñ ai falak asar le kar
terī mahfil kā yaar kyā kahnā
ham bhī nikle haiñ chashm-e-tar le kar
aap maiñ ne diyā dil us but ko
jhuk ga.ī shāḳh ḳhud samar le kar
thā qafas kā ḳhayāl dāman-gīr
uḌ sake ham na baal o par le kar
'vahshat' us bazm meñ rahe the raat
sub.h nikle haiñ dard-e-sar le kar