amiir laakh idhar se udhar zamāna huā
vo but vafā pe na aayā maiñ be-vafā na huā
sar-e-niyāz ko terā hī āstāna huā
sharāb-ḳhāna huā yā qimār-ḳhāna huā
huā faroġh jo mujh ko ġham-e-zamāna huā
paḌā jo daaġh jigar meñ charāġh-e-ḳhāna huā
ummīd jā ke nahīñ us galī se aane kī
ba-rañg-e-umr mirā nāma-bar ravāna huā
hazār shukr na zaa.e huī mirī khetī
ki barq o sail meñ taqsīm daana daana huā
qadam huzūr ke aa.e mire nasīb khule
javāb-e-qasr-e-sulaimāñ ġharīb-ḳhāna huā
tire jamāl ne zohra ko daur dikhlāyā
tire jalāl se mirrīḳh kā zamāna huā
koī gayā dar-e-jānāñ pe ham hue pāmāl
hamārā sar na huā sañg-e-āstāna huā
faroġh-e-dil kā sabab ho ga.ī bujhī jo havas
sharār-e-kushta se raushan charāġh-e-ḳhāna huā
jab aa.ī josh pe mere karīm kī rahmat
girā jo aañkh se aañsū dur-e-yagāna huā
hasad se zahr tan-e-āsmāñ meñ phail gayā
jo apnī kisht meñ sarsabz koī daana huā
chune mahīnoñ hī tinke ġharīb bulbul ne
magar nasīb na do roz āshiyāna huā
ḳhayāl-e-zulf meñ chhā.ī ye tīrgī shab-e-hijr
ki ḳhāl-e-chehra-e-zaḳhmī charāġh-e-ḳhāna huā
ye josh-e-girya huā mere said hone par
ki chashm-e-dām ke aañsū se sabz daana huā
na pūchh nāz-o-niyāz us ke mere kab se haiñ
ye husn o ishq to ab hai use zamāna huā
uThā.e sadme pe sadme to aabrū paa.ī
amiir TuuT ke dil gauhar-e-yagāna huā