shorish-e-vaqt huī vaqt kī raftār meñ gum
din guzarte haiñ tire ḳhvāb ke āsār meñ gum
kyā ajab thī vo fazāoñ meñ ghulī bū-e-qadīm
shahr kā shahr huā vahshat-e-asrār meñ gum
is kahānī kā bhī unvān koī hairat-e-husn
ā.īna aks meñ aks ā.īna-bardār meñ gum
dekh ye aañkh tirī chhab se huī ḳhākistar
sun samā.at hai tirī narmī-e-guftār meñ gum
jo tire ḳhitta-e-be-āb kī ḳhvāhish na banā
kulbulātā hai vo dariyā kisī kohsār meñ gum
ab tamannāoñ ke isbāt kā sahte haiñ azaab
ham ki rahte the kabhī nashsha-e-inkār meñ gum
kis tarah un pe ḳhamoshī ke ma.ānī khulte
umr bhar log rahe lafz kī takrār meñ gum