samā saktā nahīñ pahnā-e-fitrat meñ mirā saudā
ġhalat thā ai junūñ shāyad tirā andāza-e-sahrā
ḳhudī se is tilism-e-rañg-o-bū ko toḌ sakte haiñ
yahī tauhīd thī jis ko na tū samjhā na maiñ samjhā
nigah paidā kar ai ġhāfil tajallī ain-e-fitrat hai
ki apnī mauj se begāna rah saktā nahīñ dariyā
raqābat ilm o irfāñ meñ ġhalat-bīnī hai mimbar kī
ki vo hallāj kī suulī ko samjhā hai raqīb apnā
ḳhudā ke paak bandoñ ko hukūmat meñ ġhulāmī meñ
zirah koī agar mahfūz rakhtī hai to istiġhnā
na kar taqlīd ai jibrīl mere jazb-o-mastī kī
tan-āsāñ arshiyoñ ko zikr o tasbīh o tavāf aulā
bahut dekhe haiñ maiñ ne mashriq o maġhrib ke mai-ḳhāne
yahāñ saaqī nahīñ paidā vahāñ be-zauq hai sahbā