sahar tak us pahāḌī ke aqab meñ ro ke aatā huuñ
maiñ nuqta-hā-e-girya par ikaTThā ho ke aatā huuñ
udhar raste meñ chauthe kos par tālāb paḌtā hai
maiñ ḳhaak aur ḳhuun se luthḌī rikābeñ dho ke aatā huuñ
yahāñ ik dasht meñ fir.aun kā ahrām bantā hai
maiñ apnī pusht par chaukor patthar Dho ke aatā huuñ
abhī kuchh bāzyābī kā amal ma.akūs lagtā hai
maiñ jab bhī DhūñDne jaatā huuñ ḳhud ko kho ke aatā huuñ
jahāñ parchhā.īñ tak paḌtī nahīñ hai ḳhāk-zādoñ kī
usī ḳhālī kure par saat mausam so ke aatā huuñ