koī patthar hī kisī samt se aayā hotā
peḌ phaldār maiñ ik rāhguzar kā hotā
apnī āvāz ke jaadū pe bharosā karte
mor jo naqsh thā dīvār pe nāchā hotā
ek hī pal ko Thaharnā thā muñDeroñ pe tirī
shaam kī dhuup huuñ maiñ kaash ye jaanā hotā
ek hī naqsh se sau aks numāyāñ hote
kuchh salīqe hī se alfāz ko bartā hotā
lazzateñ qurb kī ai 'rāz' hamesha rahtīñ
shāḳh-e-sandal se koī saañp hī lipTā hotā