hazāroñ mushkileñ haiñ aur lākhoñ ġham liye haiñ ham
mohabbat kā magar hāthoñ meñ ik parcham liye haiñ ham
vo naġhme jo ḳhizāñ ko phir bahār-e-nau banāte haiñ
unhī gītoñ kī hoñToñ par na.ī sargam liye haiñ ham
hamāre dil meñ hai jazbāt kā taptā huā sūraj
jo palkoñ se chunī vo dard kī shabnam liye haiñ ham
mubārak ho ḳhirad vāloñ tumheñ fikr-o-nazar apnī
haiñ ahl-e-dil bahār-e-ishq ke mausam liye haiñ ham
palaTiye gar kabhī fursat mile aurāq maazī ke
hamārī kyā sifat bhī aur kyā kyā ġham liye haiñ ham
samajh lī ab haqīqat rahbarān-e-mulk kī sab ne
namak chuTkī meñ le kar kah rahe marham liye haiñ ham