baat ho dair-o-haram kī yā vatan kī baat ho

baat jab ho dostoñ husn-e-chaman kī baat ho

desh kī ḳhātir ḳhushī se jo luTā dete haiñ jaañ

un shahīdān-e-vatan ke bāñkpan kī baat ho

qaum-o-maz.hab kyā kisī kā aur kyā hai rañg-o-nasl

aisī bāteñ chhoḌ kar bas ilm-o-fan kī baat ho

asr-e-hāzir ne hamārā dil bhī patthar kar diyā

lāzmī hai ab vafāoñ ke chalan kī baat ho

is amal se zindagī ho jā.egī āsāñ bahut

aisā kuchh mat boliye jis meñ chubhan kī baat ho

ek hī rañgat hai sab ke ḳhuun kī to dosto

kyuuñ hamāre biich shaiḳh-o-barahman kī baat ho

mil ke baiThe haiñ to yaaro ab sunā.eñ hāl-e-dil

kuchh tumhāre dil kī ho kuchh mere man kī baat ho