gar chāhte ho farsh se aflāk pe rakkho
ik baar mujhe phir se zarā chaak pe rakkho
ik barf kī sil qalb-e-pareshāñ pe utāro
ik dasht mire dīda-e-namnāk pe rakkho
tum ramz-e-shahādat ke ma.ānī nahīñ samjhe
sar nok kī sidra pe badan ḳhaak pe rakkho
lāzim hai ki chābuk se tarāsho mirā paikar
vājib hai ki tum tursh-ravī naak pe rakkho
phir pusht pe har ḳhvāb kī zanjīr-zanī ho
jab shām-e-ġharībāñ mirī poshāk pe rakkho
yuuñ qais ke rutbe kī ḳhabar honī hai 'rāhib'
sahrā ko agar shāna-e-idrāk pe rakkho