yuuñ dekh na be-kār kā kaTh-putlī tamāshā
is daur-e-fusūñ-kār kā kaTh-putlī tamāshā
is shahr kā har jhūTā ḳhudā dekh rahā hai
haqdār kī dastār kā kaTh-putlī tamāshā
mat pūchh hai kal raat se takrār kī zad meñ
tasvīr se dīvār kā kaTh-putlī tamāshā
pāzeb kī jhankār pe ab ḳhuub sajegā
im-shām bhī bāzār kā kaTh-putlī tamāshā
ḳhāmosh nahīñ ḳhuun meñ shiddat se ravāñ hai
maqtal meñ abhī daar kā kaTh-putlī tamāshā
aurat kī kahānī ho ki 'rāhib' kā fasāna
fankār hai kirdār kā kaTh-putlī tamāshā