hai rāh-rau ke hue hādsāt kī dīvār

girā.e kaun ye gard-e-hayāt kī dīvār

sahar hamāre muqaddar se duur hotī ga.ī

buland hotī ga.ī roz raat kī dīvār

miTe jo ye hadd-e-fāsil to aap tak pahuñcheñ

hamāre biich meñ haa.il hai zaat kī dīvār

anā anā ke muqābil hai raah kaise khule

ta.alluqāt meñ haa.il hai baat kī dīvār

na jaane kaun se jhoñke meñ gir paḌe 'kaifī'

shikasta hone lagī hai hayāt kī dīvār