husn pāband-e-hinā ho jaise
ye vafāoñ kā sila ho jaise
yuuñ vo karte haiñ kinārā mujh se
is meñ merā hī bhalā ho jaise
ta.ana dete haiñ mujhe jiine kā
zindagī merī ḳhatā ho jaise
is tarah aañkh se Tapkā hai lahū
shāḳh se phuul girā ho jaise
sar-e-kohsār vo bādal garjā
dil dhaḌakne kī sadā ho jaise
hāl-e-dil pūchhte ho yuuñ mujh se
tum mire dil se judā ho jaise
yaad yuuñ aa.ī tirī ruk ruk kar
koī zanjīr-ba-pā ho jaise
ab jafā ko bhī taraste haiñ 'razā'
yahī tāsīr-e-duā ho jaise