vo merā dost hai aur mujh se vāsta bhī nahīñ
jo qurbateñ bhī nahīñ haiñ to fāslā bhī nahīñ
kise ḳhabar thī ki us dasht se guzarnā hai
jahāñ se lauT ke aane kā rāsta bhī nahīñ
kabhī jo phuuT ke ro le to chain pā jaa.e
magar ye dil mire pairoñ kā aabla bhī nahīñ
sunā hai vo bhī mire qatl meñ mulavvis hai
vo bevafā hai magar itnā bevafā bhī nahīñ
vo so sakā na jise chhīn kar kabhī mujh se
maiñ us zamīn ke baare meñ sochtā bhī nahīñ
sunā thā shahr meñ har sū tumhārā charchā hai
yahāñ to koī 'nafas' tum ko jāntā bhī nahīñ