din meñ is tarah mire dil meñ samāyā sūraj

raat āñkhoñ ke ufuq par ubhar aayā sūraj

apnī to raat bhī jalte hī kaTī din kī tarah

raat ko so to gayā din kā satāyā sūraj

sub.h niklā kisī dulhan kī damak ruḳh pe liye

shaam Duubā kisī beva sā bujhāyā sūraj

raat ko maiñ mirā saayā the ikaTThe donoñ

le gayā chhīn ke din ko mirā saayā sūraj

din guzartā na thā kam-baḳht kā tanhā jalte

vādī-e-shab se mujhe DhūñD ke laayā sūraj

tū ne jis din se mujhe sauñp diyā zulmat ko

tab se din meñ bhī na mujh ko nazar aayā sūraj

āsmāñ ek sulagtā huā sahrā hai jahāñ

DhūñDhtā phirtā hai ḳhud apnā hī saayā sūraj

din ko jis ne hameñ nezoñ pe chaḌhā.e rakkhā

shab ko ham ne vahī palkoñ pe sulāyā sūraj