vo ruuh ke gumbad meñ sadā ban ke milegā

ik din vo mujhe merā ḳhudā ban ke milegā

bhaTkūñgā maiñ is shahr kī galiyoñ meñ akelā

vo mujh ko mire dil kā ḳhalā ban ke milegā

vo daur bhī aa.egā ki har lamha-e-hastī

mujh se tire milne kī duā ban ke milegā

kis zo.am se bichhḌā hai magar dekhnā ye bhī

tū ḳhud se ḳhud apnī hī sazā ban ke milegā

ash.ār meñ dhaḌke.eñge mulāqāt ke lamhe

tū sab se mire fan kī baqā ban ke milegā