le dām-e-nigāh-e-yār aayā

karne kuuñ mujhe shikār aayā

kyuuñ aave na mujh badan suuñ ḳhush baas

mujh bar meñ vo gul-izār aayā

ḳhat dekh tere ruḳh uupar āġhāz

ā.īna uupar ġhubār aayā

jis baaj thī dil kuuñ be-qarārī

vo dil kā mire qarār aayā

zāhid ne apas kā zohd taqvā

kūche meñ tere bisār aayā

niklā hai raqīb-e-gul-badan saat

le gul kī panāh ḳhaar aayā

mujh parda-e-dil pe saaz kar ġham

ho naala merā sitār aayā

shabnam nahīñ har sahar ai 'dā.ūd'

tujh ġham suuñ gul-e-ashk-bār aayā