hamāre dil meñ vahī aks-e-yār ab bhī hai
murād ye hai ki har pal bahār ab bhī hai
tumhārī aañkh se bas aañkh hī milā.ī thī
hamārī ruuh meñ us kā ḳhumār ab bhī hai
tumheñ to farq nahīñ paḌtā ham mileñ na mileñ
tumhāre dil pe anā kā ġhubār ab bhī hai
agar ho vaqt kabhī aa ke dekh jaanā zarā
tumhāre ġham meñ koī be-qarār ab bhī hai
ham us se ruuTh ga.e duur ho ga.e 'bushrā'
magar ḳhudā kī qasam us se pyaar ab bhī hai