din Dhal chukā hai to maiñ yahī raat le chalūñ
gar vo nahīñ to us kī koī baat le chalūñ
tujh jaisā ḳhush-jamāl mire shahr meñ nahīñ
dil chāhtā hai aaj tujhe saath le chalūñ
tū fat.h-mand ho ke bhī sar kyuuñ jhukā rahā
maiñ to ḳhushī se apnī yahī maat le chalūñ
maiñ ḳhush-gumān rah ke hī ḳhush-baḳht ho ga.ī
mujh pe guzar ga.e jo vo hālāt le chalūñ
maiñ chāhtī huuñ us se ajab intiqām luuñ
'bushrā' ab apne saare vo jazbāt le chalūñ