tirī nigāh ne apnā banā ke chhoḌ diyā
hañsā ke paas bulāyā rulā ke chhoḌ diyā
hasīn jalvoñ meñ gum ho ga.ī nazar merī
ye kyā kiyā ki jo parda uThā ke chhoḌ diyā
junūñ meñ ab mujhe apnī ḳhabar na ġhairoñ kī
ye ġham ne kaun sī manzil pe lā ke chhoḌ diyā
jo ma.arifat ke gulābī nashe se ho bhar-pūr
vo jaam tū ne nazar se pilā ke chhoḌ diyā
kisī ne aaj zamāne ke ḳhauf se 'shevan'
hamārā naam bhī hoñToñ pe lā ke chhoḌ diyā