phuul jaisī hai kabhī ye ḳhaar kī mānind hai

zindagī sahrā kabhī gulzār kī mānind hai

tum qalam kī dhaar ko kam mat samajhnā dosto

ye qalam to hai magar talvār kī mānind hai

chaar din ke vāste sab ko milī hai dahr meñ

zindagī bhī ret kī dīvār kī mānind hai

paas paisa hai nahīñ phir bhī jahāñ meñ mast huuñ

zindagī apnī kisī fankār kī mānind hai

zindagī kis vaqt dhokā de de 'ambar' kyā patā

ye bhī lagtā hai kisī ġhaddār kī mānind hai