āvārgī ne dil kī ajab kaam kar diyā
ḳhvāboñ ko bojh nīndoñ ko ilzām kar diyā
kuchh aañsū apne pyaar kī pahchān ban ga.e
kuchh āñsuoñ ne pyaar ko bad-nām kar diyā
jis ko bachā.e rakhne meñ ajdād bik ga.e
ham ne usī havelī ko nīlām kar diyā
dil ko bachā ke rakkhā thā duniyā se aaj tak
le aaj ham ne ye bhī tire naam kar diyā
tum ne nazar jhukā ke jahāñ baat kaaT dī
ham ne vahīñ fasāne kā anjām kar diyā