kuchh bhī ho ye to mire yaar nahīñ ho saktā

maiñ tirā hāshiya-bardār nahīñ ho saktā

dil se tum jā to rahe ho magar itnā sun lo

ye darīcha kabhī dīvār nahīñ ho saktā

rasm-e-iz.hār-e-mohabbat meñ zarūrī hī sahī

ye tamāshā sar-e-bāzār nahīñ ho saktā

vasl kī chaah karūñ hijr meñ bhī aah bharūñ

ye mire ishq kā me.aar nahīñ ho saktā

apnī tārīf sunī hai to ye sach bhī sun le

tujh se achchhā tirā kirdār nahīñ ho saktā