barg-e-sadā ko lab se uḌe der ho ga.ī
ham ko bhī ab to ḳhaak hue der ho ga.ī
ab sāhiloñ pe kis ko sadā de rahe ho tum
lamhoñ ke bādbān khule der ho ga.ī
ai husn-e-ḳhud-parast zarā soch to sahī
mehr-o-vafā se tujh ko mile der ho ga.ī
terā visāl ḳhair ab ik vāqi.a huā
ab apne-āp se bhī mile der ho ga.ī
sadiyoñ kī ret Dhāñp kar āsūda ho ga.e
sar ko hamāre tan se kaTe der ho ga.ī
sarsar ho yā sabā ho ki hoñ tez āñdhiyāñ
ham ko fasīl-e-shab pe jale der ho ga.ī
terī galī ke moḌ pe pahuñche the jald ham
par tere ghar ko aate hue der ho ga.ī
ik daur thā 'shanās' sadā thī mirī buland
aur ab to mere hoñT sile der ho ga.ī