anā muñh āñ.suoñ se dho rahī hai
zarūrat sar-ba-sajda ho rahī hai
mirī dushman mirī be-bāk-goī
mirī rāhoñ meñ kāñTe bo rahī hai
riyā-kārī liye jaatī hai sabqat
haqīqat sar jhukā.e ro rahī hai
musalsal ik aziyyat zindagānī
ġhamoñ ke bojh sar par Dho rahī hai
zamāna maslahat-parvar huā hai
zarūrat ādmīyyat kho rahī hai
kisī kī shaḳhsiyat majrūh kar dī
zamāne bhar meñ shohrat ho rahī hai