Ahmad Ashfaq

de ke wo sare iKHtiyar mujhe

Ahmad Ashfaq

Samastipur, Bihar, India

1969

de ke vo saare iḳhtiyār mujhe

aur kartā hai sharmsār mujhe

zaḳhm tartīb de rahā huuñ maiñ

aur kuchh vaqt de udhār mujhe

pārsā.ī zo.am hai un ko

kah rahe haiñ gunāhgār mujhe

fāsle ye simaT nahīñ sakte

ab parāyoñ meñ kar shumār mujhe

dil ke gulshan meñ tum chale aao

aur kar do sadā-bahār mujhe

tark-e-ulfat ke ba.ad bhī 'ashfāq'

terā rahtā hai intizār mujhe

Top Urdushayar.com