ik aks dil ke taT se be-iḳhtiyār phūTe
jab chāñd us nagar kī jhīloñ ke paar phūTe
sadqa utārne ko tere madhur nayan kā
ubhre ka.ī sitāre ġhunche hazār phūTe
vo aur maiñ nadī ke naġhmoñ pe bahtī naav
naav meñ us ke mukh se ujlā nikhār phūTe
kānoñ meñ ab bhī khankeñ gajre tire gajar-dam
is ghar se jab dhueñ kā niilā ġhubār phūTe
mujh ko jhulā rahe haiñ gītoñ ke jhūlne meñ
naġhme jo pāyaloñ ke sapnoñ ke dvaar phūTe
us sāñvle badan par mahkeñ ḳhunuk savere
un mast añkhḌiyoñ se rañgoñ kī phuvār phūTe
mat ro phir ā.ūñgā maiñ parbat pe tujh se milne
jab barf-zār pighle jab ābshār phūTe