dhun nahīñ koī mudda.ā kaisā

dil huā dekh be-sadā kaisā

merī tausīf saal sadiyāñ sanā

meñ nahīñ jab to phir ḳhudā kaisā

lift khambe tū aur maiñ peḌ pahāḌ

vaqt vaadī meñ jam gayā kaisā

dūsroñ kī kahī-sunī pe na jā

tū batā tujh se maiñ rahā kaisā

shab kī shab saath phir na bol na baat

kyā kahūñ hai vo sāñvrā kaisā

maiñ tujhī meñ nihāñ tujhī pe ayaañ

maiñ huuñ maujūd māvarā kaisā

rañg meñ baas añg umañg meñ pyaas

phuul hī hai vo phuul sā kaisā

sāmne sach ke karbalā-o-damishq

kalima-e-haq pe aur sila kaisā

do alag bañs purkh-pat birhā

ab tire sañg silsila kaisā

kohar kohsār raat terā saath

chāñd niklā nayā nayā kaisā

aarzū ik janam maran yakjā

mujh meñ tujh meñ thā rābta kaisā

zulm mansab sabhī kā tū ho ki maiñ

luuñ yahāñ haqq-e-ḳhūñ-bahā kaisā

dhaḌke pal chhan sajan salone bin

dil hai be-dard bāñvarā kaisā