samundar meñ khaḌe ho ro rahe ho
ye kaisī mailī chādar dho rahe ho
ye duniyā mas.ala allāh kā hai
ye miTTī sar pe tum kyuuñ Dho rahe ho
hamāre āñsuoñ ke jugnuoñ se
sitāro kyuuñ pareshāñ ho rahe ho
samundar ko dikhā kar aag ab kyuuñ
duā kī bārishoñ ko ro rahe ho
jahāñ purkhoñ ke sajdoñ ke nishāñ haiñ
vo galiyāñ ḳhuun se kyuuñ dho rahe ho
sunā hogā hamārā hādsa bhī
hamāre shahr meñ tum to rahe ho
nahīñ gar jān-e-jāñ to dushman-e-jāñ
hamārī jaan ke kuchh to rahe ho
tumheñ to ḳhuub hañsnā chāhiye 'ashk'
hamāre haal par tum ro rahe ho