talab kī aag kisī shola-rū se raushan hai

ḳhayāl ho ki nazar aarzū se raushan hai

janam janam ke andheroñ ko de rahā hai shikast

vo ik charāġh ki apne lahū se raushan hai

kahīñ hujūm-e-havādis meñ kho ke rah jaatā

jamāl-e-yār mirī justujū se raushan hai

ye tābish-e-lab-e-lālīñ ye shola-e-āvāz

tamām bazm tirī guftugū se raushan hai

visāl-e-yār to mumkin nahīñ magar nāseh

ruḳh-e-hayāt isī aarzū se raushan hai