kitne diip bujhte haiñ kitne diip jalte haiñ
azm-e-zindagī le kar phir bhī log chalte haiñ
kārvāñ ke chalne se kārvāñ ke rukne tak
manzileñ nahīñ yaaro rāste badalte haiñ
mauj mauj tūfāñ hai mauj mauj sāhil hai
kitne Duub jaate haiñ kitne bach nikalte haiñ
mehr-o-māh-o-anjum bhī ab asīr-e-getī haiñ
fikr-e-nau kī azmat se roz-o-shab badalte haiñ
bahr-o-bar ke siine bhī ziist ke safīne bhī
tīrgī nigalte haiñ raushnī ugalte haiñ
ik bahār aatī hai ik bahār jaatī hai
ġhunche muskurāte haiñ phuul haath malte haiñ