ġhubār-e-dard meñ rāh-e-najāt aisā hī

rahā hai koī mire saath saath aisā hī

to bhuul paane meñ dushvāriyāñ bahut hoñgī

kiyā hai pyaar had-e-mumkināt aisā hī

baras guzar ga.e us se judā hue lekin

ajiib bain hai mauj-e-furāt aisā hī

use bhī os meñ Duubā huā lagā thā badan

mujhe bhī kuchh huā mahsūs raat aisā hī

maiñ jis se ḳhauf-zada thā shurūa se āḳhir

tamāshā kar ga.ī ye kā.enāt aisā hī

koī bhī rañg mayassar na aa sakā to phir

qubūl kar liyā rañg-e-hayāt aisā hī