ināyat hai tirī bas ek ehsān aur itnā kar
mire is dard kī mī.ād meñ bhī kuchh izāfa kar
gumāñ se bhī ziyāda chāhiye sarsabz kisht-e-jāñ
faqat pichhle pahar kyā har pahar ai aañkh barsā kar
to phir ikrām kyā shai hai jo tanhā.ī meñ tanhā huuñ
koī mahfil atā kar qā.ede kī us meñ tanhā kar
nafas kī āmad-o-shud ruk na jaa.e peshtar is se
zamīñ ko aur nīchā āsmāñ ko aur ūñchā kar
bahut mumkin hai merī bāteñ be-ma.anī lageñ tujh ko
inheñ majzūb kī baḌ jaan aur chup-chāp sochā kar