savāl-e-lutf-o-karam par qayās kyā karte
vo mil bhī jaatā to ham nā-sipās kyā karte
har ek shaḳhs milā dāstān-e-dard liye
ham apne zaḳhm-e-nihāñ be-libās kyā karte
vo ghūmtā phire le kar jahān muTThī meñ
ham apnā ḳhauf liye ās-pās kyā karte
dil-o-dimāġh pe jab iḳhtiyār thā us kā
kisī havāle se phir iltibās kyā karte
ye sochte the kaheñ hāl-e-dil use lekin
batā ke 'kaif' use dukh udaas kyā karte