jo merā hosh kā aalam hai be-ḳhudī to nahīñ
maiñ jis ko apnā samajhtā huuñ ajnabī to nahīñ
ḳhudā-garī kā ye māhir kuchh aur hī shai hai
tum aadmī jise kahte ho aadmī to nahīñ
ye aur baat hai mahrūm-e-iltifāt huuñ maiñ
tire karam ke ḳhazāne meñ kuchh kamī to nahīñ
subūt miltā hai us se kisī ta.alluq kā
kamāl-e-barhamī-e-dost dushmanī to nahīñ
nigāh-o-dil meñ bhī lāzim hai ik muravvat-o-kaif
numūd-e-āriz-o-gesū hī dilbarī to nahīñ
nuzūl-e-barq hai shāyad ye āshiyānoñ par
tū raushnī jise samjhā hai raushnī to nahīñ
tumhāre chehre pe āsār haiñ ḳhushī ke magar
jo mere chehre se zāhir hai vo ḳhushī to nahīñ
piye sharāb ibādat-guzār hue ai shaiḳh
magar huzūr ye shāyān-e-bandagī to nahīñ
na jaane kyuuñ mire dil ko yaqīñ nahīñ aatā
jo tū ne jalva dikhāyā hai aarzī to nahīñ
sunā hai tauba se hotā hai tāza-tar īmāñ
hazār shukr ki ye āriza abhī to nahīñ
tabāhiyoñ ke liye musta.id haiñ ahl-e-jahāñ
ye āgahī kahīñ tauhīn-e-āgahī to nahīñ
bas ek marg-e-musalsal bas ek rañj-e-davām
kuchh aur shai hai ye ai 'arsh' zindagī to nahīñ