kyuuñ na ho dād-talab himmat-e-mardāna-e-dil
mā.il-e-husn-e-jahāñ-soz hai parvāna-e-dil
ek ibrat kā muraqqa.a hai alam-ḳhāna-e-dil
hasrat-o-yās kā afsāna hai afsāna-e-dil
jis ko rahtī hai kisī aur ke jalve kī talāsh
us ne dekhā hī nahīñ jalva-e-jānāna-e-dil
ab maiñ samjhā ki mohabbat meñ asar hai kitnā
log sunte haiñ baḌe shauq se afsāna-e-dil
qābil-e-dād hai ye shauq-e-talab ai saaqī
le ke aayā huuñ maiñ TuuTā huā paimāna-e-dil
ik zamāne ko jilā detā hai jal kar ai 'arsh'
shola-e-barq-e-jahāñ-soz hai parvāna-e-dil