dayār-e-dil na rahā bazm-e-dostāñ na rahī
amaañ kī koī jagah zer-e-āsmāñ na rahī
ravāñ haiñ aaj bhī rag rag meñ ḳhuun kī maujeñ
magar vo ek ḳhalish vo matā-e-jāñ na rahī
laḌeñ ġhamoñ ke añdheroñ se kis kī ḳhātir ham
koī kiran bhī to is dil meñ zau-fishāñ na rahī
maiñ us ko dekh ke āñkhoñ kā nuur kho baiThā
ye zindagī mirī āñkhoñ se kyuuñ nihāñ na rahī
zabāñ milī bhī to kis vaqt be-zabānoñ ko
sunāne ke liye jab koī dāstāñ na rahī