buniyād-e-jahāñ meñ kajī kyuuñ hai
har shai meñ kisī kī kamī kyuuñ hai
kyuuñ chehra-e-ḳhār shagufta hai
aur shāḳh-e-gulāb jhukī kyuuñ hai
vo vasl kā din kyuuñ chhoTā thā
ye hijr kī raat baḌī kyuuñ hai
jis baat se dil meñ halchal hai
vo baat laboñ pe rukī kyuuñ hai
mat dekh ki kaun hai parvāna
ye soch ki sham.a jalī kyuuñ hai
na the ḳhvāb to aañsū hī hote
mirā kāsa-e-chashm tahī kyuuñ hai