shikva koī dariyā kī ravānī se nahīñ hai

rishta hī mirī pyaas kā paanī se nahīñ hai

kal yuuñ thā ki ye qaid-e-zamānī se the bezār

fursat jinheñ ab sair-e-makānī se nahīñ hai

chāhā to yaqīñ aa.e na sachchā.ī pe us kī

ḳhā.if koī gul ahd-e-ḳhizānī se nahīñ hai

dohrātā nahīñ maiñ bhī ga.e logoñ kī bāteñ

is daur ko nisbat bhī kahānī se nahīñ hai

kahte haiñ mire haq meñ suḳhan-fahm bas itnā

sheroñ meñ jo ḳhūbī hai muānī se nahīñ hai