ye jagah ahl-e-junūñ ab nahīñ rahne vaalī
fursat-e-ishq mayassar kahāñ pahle vaalī
koī dariyā ho kahīñ jo mujhe sairāb kare
ek hasrat hai jo puurī nahīñ hone vaalī
vaqt koshish kare maiñ chāhūñ magar yaad tirī
dhundlī ho saktī hai dil se nahīñ miTne vaalī
ab mire ḳhvāboñ kī baarī hai yahī lagtā hai
niiñd to chhin chukī kab kī mire hisse vaalī
in dinoñ maiñ bhī huuñ kuchh kār-e-jahāñ meñ masrūf
baat tujh meñ bhī nahīñ rah ga.ī pahle vaalī