ham paḌh rahe the ḳhvāb ke purzoñ ko joḌ ke
āñdhī ne ye tilism bhī rakh Daalā toḌ ke
āġhāz kyuuñ kiyā thā safar in ḳhalāoñ kā
pachhtā rahe ho sabz zamīnoñ ko chhoḌ ke
ik buuñd zahr ke liye phailā rahe ho haath
dekho kabhī ḳhud apne badan ko nichoḌ ke
kuchh bhī nahīñ jo ḳhvāb kī sūrat dikhā.ī de
koī nahīñ jo ham ko jagā.e jhiñjhoḌ ke
in pāniyoñ se koī salāmat nahīñ gayā
hai vaqt ab bhī kashtiyāñ le jaao moḌ ke