havā chale varaq-e-ārzū palaT jaa.e

tulūa ho koī chehra to dhund chhaT jaa.e

yahī hai vaqt ki ḳhvāboñ ke bādbāñ kholo

kahīñ na phir se nadī āñsuoñ kī ghaT jaa.e

bulandiyoñ kī havas hī zamīn par laa.ī

kaho falak se ki ab rāste se haT jaa.e

giraft Dhīlī karo vaqt ko guzarne do

ki Dor phir na kahīñ sā.atoñ kī kaT jaa.e

isī liye nahīñ sote haiñ ham ki duniyā meñ

shab-e-firāq kī sauġhāt sab meñ baT jaa.e